О.Дашбалбар "АМЬДДАА БИЕ БИЕНЭЭ ХАЙРЛА ХҮМҮҮС ЭЭ"

Амьддаа бие биенээ хайрла хүмүүсээ
Алив сайхнаа бусдаас битгий хармал
Хэрэггүй үгийн зэвээр зүрхийг минь бүү шархлуул
Хэн нэгнийгээ харанхуй нүхрүү бүү түлх

Архинд орсон нэгнийгээ шоолж бүү инээ
Аяа чиний аав чинь ч байж мэднэ шүү дээ
Амжиж чи өөрөө алдрын зэрэгт хүрсэн бол
Аз жаргалын хаалгыг бусаддаа нээж өг
Ачийг чинь тэд бас бүү мартаг
 

О.Дашбалбар "ЗАЛУУС ДҮҮ НАРТАА ХҮРГЭХ ШҮЛЭГ"

Үзээд өнгөрөх амьдралыг мөнхийн юм шиг бодож 
Үдлээд буцах хорвоог үүрдийн юм шиг сэтгэж
Залуу, идэр насаа хөгшрөхгүй юм шиг санаж 
Замба тивийн элгэн дзэр туйлж яваа дүү минь! 

Өнгө энэ алаг хорвоо дээр 
Өөрийн сайндаа чи төрөөгүй! 
Өдөр өдрийн нарыг үзэж, тэнгэрийг харах 
Өндөр их тавилан хайрласан аав, ээждээ баярла! 

О.Дашбалбар "ТЭНГЭР ШИГ БАЙ"

Хамаг бүгдээр чамайг 
Харааж нулимж байвч, тэнгэр шиг бай! 
Хамгийн сайн хүмүүс гэж 
Хашгирч ерөөж байвч, тэнгэр шиг бай! 
Тэвчээр барагдаж, нөхөд чинь орхивч 
Тэнгэр шигбай, мөнхөд амгалан... 
Тэргэнд суулгаж, алтан титэм өмсгөвч 
Тэнгэр шиг бай, юу ч болоогүй юм шиг... 
Хамгийн хайртай хүн чинь хаяж одсон ч 
Хан тэнгэр нурчхаагүй цагт, бүү зов! 
Гүтгэж, доромжилж бахаа ганц хангавч 
Гүн тэнгэр хэмхрээгүй цагт, бүү ай! 

О.Дашбалбар "ЭХ ОРОН МИНЬ"

Тэнгэрлэг эх орон минь тандаа мөргөмү 
Тэнд энд хэвтэх чулуунд чинь үнэн оршдогт итгэмү 
Амьд яваа минь таны гүн таалал гэмү 
Аугаа их тандаа би өдөр бүхэн мөргөмү 
Амьсгалах тоолондоо тандаа хүрч очму 
Аньсан нүдэндээ ч би таныгаа харму

О.Дашбалбар "МОНГОЛОО МУУЛЖ ХАРИЙНХАНД БӨХӨЛЗӨГСДӨД!!!

Монгол минь үхэхийг чи үзэхгүй

Мэргэд минь цөөрөхийг чи үзэхгүй

Мэлмий минь цочрохыг чи үзэхгүй

Түүх минь мартагдахыг чи үзэхгүй

Түмэн минь мөхөхийг чи үзэхгүй

Үнэн минь алдрахыг чи үзэхгүй

Үлгэр минь дуусахыг чи үзэхгүй

Төрөл минь тасрахыг чи үзэхгүй

Соёмбо минь бүдгэрэхийг чи үзэхгүй

Соёл минь солигдохыг чи үзэхгүй

Онон минь ширгэхийг чи үзэхгүй

Олон минь зовохыг чи үзэхгүй